John 15
Iesu Anu Ovu Uaini Maninasou
1Eni loxo ovu uaini maninasou. Mamilo anu moosou xai. 2 aAvolo vile unene'a uasi, la Mamilo ulixinu uxexeenu. Ia avolo vile unene'a mo temanu, la Anu usaxila'u mo uxexeenu malumalusou no anu mo sou unene'a laixe. 3Ia ngingi ne, no anu vaivaikala noxilosi la mu'oxongengi ngexali malemalenga mukalu. 4Ngingi ngaxolu noxilo mo eni axolu noxinge. Ovu avolu vile uxolu no aiinu uasi, la umomomo sou unene'a uasi. Aloxo ngingi ngaxolu noxilo uasi, la umomomo sou nganene'a uasi. 5Eni loxo ovu uaini, ia ngingi loxo avoavolu. Itema vile uxolu noxilo xe eni axolu noxou, la anu unene'a laixe. Ia lexe itema vile uxolu va'axu noxilo, la umomomo sou u'oxonu mii vile uasi. 6 bLexe itema vile uxolu noxilo uasi, la anu aloxo ovu avolu ane mixexeenu ia milai misu'a la'oluxu sou u'ela. 7Ngingi ngaxolu noxilo xe vaikala noxilo uxolu noxinge, la ngalingau mii ma'ia ane ngingi ngamasaxau, la anu uxali. 8 cNgingi nganene'a laixe xe ngaxali ta molomolo noxilo, la Mamilo uno'u uala tila. 9Aloxo Mamilo mumasaxailo, la eni emasaxainge kalumo. La sou ngingi kalumo ngamasaxainge ngato'o aloxo eni emasaxainge. 10 dLexe ngingi ngamulinu lapuloto noxilo, la ngingi ngamasaxainge ngato'o aloxo eni emasaxainge. Aloxo eni emulinu lapuloto noxou Mamilo, la eni emasaxau Mamilo aloxo Mamilo mumasaxailo. 11Eni evikalangengi aloxo ne, mo sou 'osa'ila noxilo uxolu noxinge mo 'osa'ila noxinge ne u'ana'ana manina. 12 eLapuloto noxilo ne aloxo 'o. Ngamasaxainge ngato'o aloxo eni emasaxainge. 13 fItema vile umasaxai'a ta menexu mo usolisi'a, la anu 'ilixo ane ne anu mutila musuku. 14 gLexe ngingi ngamulinu vaikala e eni elomolu, la ngingi ngaxolu ta menexilo. 15Eni amoxo'inge lexe ta mitema sou ipalupalusi'a uasi. Xo ane'i ilavusou mii ma'ia ane tilasi'a u'oxonu uasi. Ia eni amoxo'inge lexe ta menexilo. Xo eni elosinge mii ma'ia mukalusi ane eni elomusou noxou Mamilo. 16Ngingi ngasosovosilo uasi. Eni esosovosinge sou ngalai mo nganene'a. La nene'angenge ne, uxolu laixesi. Xe mii ma'ia ane ngingi ngalingau no ualasilo, la Mamilo anu ulosingesi. 17 hLapuloto noxilo aloxo 'o. Ngamasaxainge ngato'o.Ta Mitema sou Lia 'o I'oxo 'Ili'ilixo Masua Noxi'a ta Molomolo Noxou Iesu
18Ia lexe ta mitema no lia 'o imasaxainge manina uasi, la ngalavusou lexe ane'i mi'oxonu noxilo tei aloxo ne. 19 iLexe ngingi loxo ta mitema no lia 'o, la ane'i imasaxainge loxo ngingi ta na'a. Ia ngingi ta mitema no lia 'o uasi, xo eni esosovosinge mo elaangengi. La sou ta mitema no lia 'o, imasaxainge manina uasi. 20 jNgaxavutalanu vaikala ane eni elemolu tei lexe itema sou ipalupalusou ne, anu utila noxou tilasou uasi. Lexe ta mitema i'oxoleli masua la ane'i i'oxo masuangengi kalumo. Ia lexe ane'i imulinu vaivaikala noxilo, la ane'i imulinu noxinge kalumo. 21Ane'i ilavusou itema e mupalusilo ene'e uasi, la sou ane'i i'oxo masuangengi xo ane'i milavusou lexe ngingi ta noxilo. 22Ia lexe eni ane'e avikalane'i lamana uasi, la ane'i isusu uasi. Ia vaimomo eni evikalane'i lamana, la sou vote'i vile sou italumeu susu noxi'a uasi. 23 kAnu ane umasaxailo manina uasi, la anu umasaxau Mamilo kalumo uasi. 24Lexe eni a'oxonu xaixai e evile u'oxonu uasi no taiine'i uasi, la ane'i isusu uasi. Ia vaimomo ane'i mimaisou sosovo mose'i noxilo, ia ane'i imasaxaixe noxou Mamilo uasi. 25 lAne'i mi'oxonu 'ilixo aloxo ne, sou umomomo sou kaukavu vile muai no nano no Lavuku Tavuna teinu. Mikaukavunu aloxo 'o, ‘Ta mitema i'oxo masualeli vitanisi.’ 26 mNo mine eni apalusou itema sou usaxila'inge, anu Uleenu Tavuna maninasou molu noxou Mamilo une'e, la Anu uvikala lamanasilo. 27Ngingi kalumo ngavikala lamanasilo. Xo ngingi ngexolu noxilo no mine eni esokou xaixai mo mune'e muxali vaimomo 'o.
Copyright information for
ATA